ཞོགས་པའི་ཚོར་སྣང༌།

མཁའ་རླུང་གཙང་མས་དབུགས་ཀྱི་རྒྱུ་བ་བརྟས།།

འཆར་ཀའི་ཉི་གཞོན་རི་བོའི་ཕྲག་ཏུ་བརྗིད།།

དཀར་གཙང་ཆུ་འཛིན་ཤམ་བུ་བརྩེགས་པ་བཞིན།།

ཀུན་གསལ་དབྱིངས་སུ་མཛེས་སྡུག་ཅི་ཡང་བཀྲ།།

སྔོ་ལྗང་རི་ཀླུང་སྨུག་པའི་རྩིབ་ཤར་བསྒྲེངས།།

གངས་ཀྱི་ཆུ་ཕྲན་ལྷུང་ལྷུང་གཡས་ནས་རྒྱུ།།

གཡུ་མདོགས་ལོ་འདབ་ལྗོན་བཟང་རྩེ་ན་རྒྱས།།

ནག་མའི་བྱ་ཚོགས་སྙན་པའི་མགྲིན་གླུ་ལེན།།

སྣུམ་པའི་གྲིབ་བསིལ་ལྡན་པའི་སྡོང་འོག་ན།།

རྩེ་གཅིག་བརྩོན་པའི་དཔེ་ཆ་ཀློག་པའི་ཚེ།།

སྐྱིད་པའི་དབེན་གནས་ཉམས་དགའི་ཁོར་ཡུག་ཞིག།

སྔོན་བསག་ལས་ཀྱིས་གསར་དུ་བསྐྲུན་པ་འདྲ།།

ཨེ་མ་བཀྲ་ཤིས་མི་ཆོས་མཆོག་མ་སྟེ།།

སེམས་སོང་བུ་མོའི་བཞིན་རས་སྒྱུ་མའི་གཟུགས།།

ཡུན་རིང་གོམས་པས་གཞལ་དཀའི་བག་ཆགས་ཀྱིས།།

འགོག་མེད་ཡིད་ཀྱི་ངོགས་སུ་ཝ་ལེར་ཤར།།

སྔོ་ལྗང་མྱུ་གུ་བུད་པའི་ལོ་མ་རྣམས།།

ལིང་ལིང་གར་སྟབས་རླུང་བུས་བསྒྱུར་བའི་ཚེ།།

མཚར་སྡུག་ལང་ཚོ་རྫོགས་པའི་སྙིང་སྡུག་མའི།།

གནག་སྣུམ་ལན་བུ་སླར་ཡང་མིག་ལ་གཟན།།

ཁེར་རྐྱང་སེམས་པ་བསིལ་བའི་རླུང་བུ་དང༌།།

འགྲོག་བཞིན་མཛའ་རྩེ་རྒོད་པའི་ཞུན་ཐིག་མིའི།།

འགྲམ་ཆང་འོ་ཡི་ཟིལ་དངར་བདུད་རྩིའི་རོ།།

བསྐལ་པའི་བར་དུ་ཡ་ཆུང་སྙིང་ལ་སིམ།།

དགོང་མོའི་ཉི་མ་ནུབ་རིའི་མཁའ་མཐར་བཞུད།།

བསིལ་བའི་གྲིབ་མ་མཚེའུ་འགྲམ་དུ་འཕོས།།

གསེར་མདོགས་འོད་ཐིགས་རླབས་ཕྲེང་དང་འགྲོག་པས།།

སྣ་ཚོགས་རིན་ཆེན་མཛེས་བརྒྱ་སྤྲས་པ་བཞིན།།

སྤྱི་ལོ་༢༠༠༩ ལོར་གངྒའི་བཞད་སྒྲའི་དུས་དེབ་ནང་སྤེལ་ཟིན་པ་ཞིག་ཡིན།