༄༅། །མཆོད་རྟེན་ཆེན་པོ་བྱ་རུང་ཁ་ཤོར་གྱི་ལོ་རྒྱུས་ཐོས་པས་གྲོལ་བ།

ཕྱོགས་བཅུ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་བཅད་ཀྱི་ཐུགས་གཉིས་སུ་མེད་པ་ཆོས་ཀྱི་སྐུའི་རྟེན་མཆོད་རྟེན་ཆེན་པོ་བྱ་རུང་ཁ་ཤོར་ཞེས་བྱ་བ་འདི་ཉིད་ཀྱི་ལོ་རྒྱུས་ནི། མེ་ཕོ་སྤྲེལ（སྤྱི་ལོ༨༡༦）ཟླའི་ཚེས་བཅུའི་ཉིན། དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཆེན་པོའི་བར་ཁང་དུ། ཆོས་རྒྱལ་ཁྲི་སྲོང་ལྡེ་བཙན་རྗེ་འབངས་ཉི་ཤུ་རྩ་ལྔ་ལ་བླ་མ་ཡང་གསང་ཐུགས་ཀྱི་སྒྲུབ་པའི་དབང་བསྐུར་ཆེན་པོ་མཛད་པའི་དུས། ཟ་འོག་གི་འབོལ་དགུ་རྩེག་གི་སྟེང་དུ། ཨུ་རྒྱན་རིན་པོ་ཆེ་བཞུགས་སུ་གསོལ། གསེར་སྐྱོགས་རྒུན་ཆང་གིས་བཀང་ནས་ཕྱག་ཏུ་ཕུལ།

༄༅། །དུས་ཆེན་གྱི་བཤད་པ་ངོ་མཚར་དགའ་སྐྱེས་ཅེས་བྱ་བ་བཞུགས་སོ།

སྟོན་པ་བཅོམ་ལྡན་འདས་མཉམ་མེད་ཤཱཀྱའི་རྒྱལ་པོ་ལ་ཕྱག་འཚལ་ལོ། །འདིར་བདག་ཅག་གི་སྟོན་པ་ཤཱཀྱ་ཐུབ་པས་བྱིན་གྱིས་བརླབ་པའི་དུས་ཆེན་གྱི་རྣམ་ གཞག་འཆད་པ་ལ། ཆོ་འཕྲུལ་གྱི་དུས་ཆེན་བཤད་པ། དུས་ཆེན་གཞན་བཤད་པ། དུས་ཆེན་དེ་དག་ལ་དགེ་བ་བྱས་པའི་ཕན་ཡོན་བཤད་པ། ཞར་བྱུང་གཞན་བཤད་པ་དང་བཞི། དང་པོ་ལ། ཆོ་འཕྲུལ་གྱི་དུས་ཆེན་དུས་ནམ་གྱི་ཚེ་བྱུང་བ། རྐྱེན་ཇི་ལྟ་བུས་བྱུང་བ། ཚུལ་ཇི་ལྟར་བྱུང་བ་བཤད་པ་དང་གསུམ། དང་པོ་དུས་ནམ་གྱི་ཚེ་བྱུང་བ་ནི། བདག་ཅག་གི་སྟོན་པ་ཤཱཀྱ་ཐུབ་པ་དགོང་ལོ་ང་བདུན་པ་མེ་ཕོ་འབྲུག་གི་ལོ་བྱུང་། རྐྱེན་ཇི་ལྟ་བུས་བྱུང་བ་ནི།