རྨི་ལམ་ནང་གི་ཡུམ་ཆེན།

རྟ་བདུན་དབང་པོ་ཆུ་ལྷའི་ཕང་བར་ཡིབས།།

འོད་དཀར་ཟེར་གྱིས་ས་འཛིན་མོག་པོར་བྱས།།

དྲན་ཤེས་ཆུ་འཛིན་འཁྲིགས་པའི་སྨག་རུམ་ན།།

གཏི་མུག་གཉིད་ཀྱི་སྒྱུ་མའི་ཞིང་ལ་ཉུལ།།

རབ་རིབ་རྨི་ལམ་གྲོང་གི་ཚོང་འདུས་སུ།།

ཚེ་འདིར་དྲིན་གྱིས་བསྐྱངས་པའི་ཡབ་ཡུམ་དང་།།

མཛའ་བཤེས་སྤུན་ཉེའི་འཛུམ་པའི་བཞིན་རས་དག།

མཇལ་བས་སྐྱོ་གདུང་མིག་ཆུ་སེམས་ལ་བཞུར།།

 དགའ་སྐྱོ་འདྲེས་མའི་ཚོར་འདུ་ཟབ་དང་ལྷན།།

བགྲང་བྱ་བཅུ་ཕྲག་འདས་པའི་ལོ་ཟླའི་ནང་།།

ཡ་མ་ཟུང་གིས་བསྐྱེལ་བའི་བདེ་སྡུག་སོགས།།

ངུ་མ་དགོད་ཀྱི་སྙིང་གཏམ་གླེང་ལ་ཕྱོགས།།

ནག་ཕྱོགས་བཙན་གནོན་མུན་པ་སྟུག་ན་ཡང་།།

གནའ་དེང་ཤེས་ཡོན་སྒྲོན་མེ་སྤར་བྱས་ན།།

གཉིས་སྨན་ཞི་མོལ་སྐྱ་རེངས་བུ་མོ་ཡིས།།

མི་རིང་ཞི་བདེའི་ཉི་བཞོན་བསུ་བར་བསྙད།།

འདུ་ཤེས་མི་གསལ་མི་རིག་མུན་པས་བསྒྲིབས།།

ཚོར་རྟོག་གཉིད་ཀྱིས་མྱོས་པའི་ཐ་མལ་སེམས།།

འཁྲུལ་སྣང་རྨི་ལམ་སྒྱུ་མའི་གྲོང་ཁྱེིར་ནས།།

བག་ཆགས་ལས་ཀྱིས་སྤྲུལ་པའི་གཉེན་བཤེས་མཐོང་།།

དཀའ་སྡུག་ལོ་ཟླ་དུས་ཀྱི་ཕོ་ཉ་ཡིས།།

བྲིས་པའི་རི་མོ་དཔྲལ་བར་བཀོད་བྱས་པའི།།

སྐྱོ་ཉམས་ཨ་མའི་འཛུམ་རིས་མཐོང་བའི་ཚེ།།

ཡ་ཆུང་སྙིང་ལ་མ་བཟོད་གཟེར་ཁ་རེ།།

ལང་ཚོའི་མེ་ཏོག་རྒ་བའི་སད་ཀྱིས་བཅོམ།།

འབྱུང་བཞི་ཉམས་པའི་གཟུགས་གཞི་གོག་གིས་ལང་།།

མི་བརྟན་གོམ་འགྲོས་འཁྱོར་བའི་ཡབ་ཡུམ་དག།

བསམ་ཚེ་སེམས་ལ་བཟོད་དཀའི་སྡུག་བསྔལ་མང་།།

བརྩེ་བའི་འཛུམ་དང་མཛའ་བའི་འབེལ་གཏམ་གྱིས།།

གཅེས་སེམས་འོ་ཆུ་གཅིག་ཏུ་འདྲེས་ནས་སུ།།

འདབ་ལྡན་སྐད་སྙད་ཐོས་འཛིན་བུ་གར་ལྷུང་།།

དེ་ཚེ་ཁྲི་གདུགས་ཤར་རིའི་ཕྲག་ཏུ་འཛུམ།།

ཡིད་འོང་འདབ་གཤོག་མཛེས་པའི་ནགས་མའི་བྱ།།

གང་འདོད་འཕུར་དུ་ཡོད་པས་ཨ་རེ་དགའ།།

ཨེ་མ་ལྷ་བསམ་རྣམ་པར་དཀར་བའི་མཐུས།།

དྲིན་ཆེན་ཡབ་ཡུམ་མྱུར་དུ་མཇལ་བར་སྨོན།།

ཚོགས་གཉིས་དཔལ་རྫོགས་སྟོང་པའི་ཡེ་ཤེས་ཁམས།།

ཟླ་བཞིན་ལང་ཚོ་སྨིན་པའི་འཇོ་སྒེག་སྐུ།།

མཐར་བྱེད་སྟོབས་འཕྲོག་འཕགས་མ་ཡིད་བཞིན་མས།།

ཡབ་ཡུམ་སྲོག་གི་མདུད་བརྒྱ་བརྟན་པར་མཛོད།།

༢༠༠༨ ལོའི་དུས་དེབ་ཟླ་འོད་གཞོན་ནུའི་ནང་བཀོད་པ་ཞིག་ཡིན།