ལྷོ་འཛམ་བུའི་གླིང་གི་ཡང་སྟེང་ན།།
གངས་དཀར་པོའི་དབུ་རྩེ་མཐོ་ཞིང་བརྗིད།།
སེང་དཀར་མོའི་གཡུ་རལ་ངོམ་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
བར་རྒྱ་རྫོང་ནགས་མ་མཐུགས་ས་རེད།།
སྟག་དམར་ཡག་འཛུམ་དྲུག་བཀྲ་ས་རེད།།
གཟིག་ཁྲ་ཡག་ཐེག་ལེ་རྒྱས་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
འབྲུག་སྔོན་མོ་ཐང་ལ་ཉལ་འདྲ་བའི།།
ཆབ་ཆུ་བོའི་བབ་རྒྱུན་རིང་ས་རེད།།
ཉ་གསེར་མིག་གཤོག་རྩལ་རྒྱས་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
རྒན་ཡ་རབ་ལ་གུས་བཀུར་ཆེ་ས་རེད།།
དམན་གྲོགས་ལ་བྱམས་བརྩེས་སྐྱོང་ས་རེད།།
ལས་དགེ་སྡིག་ལ་སྤང་བླངས་བྱེད་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
སྨན་བུ་མོ་སྐྱེ་ལོ་ཡག་ས་རེད།།
མགོ་སྐྲ་ལོ་ལན་བུས་མཛེས་ས་རེད།།
གཟི་བྱུ་རུའི་རྒྱན་ཆ་དར་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
སྟག་ཤ་ར་དཔལ་རྩལ་རྒོད་ས་རེད།།
བོག་ཁྲ་རིང་གཟི་ཁ་བཙན་ས་རེད།།
གཉེན་ཕུ་ནུའི་ལ་རྒྱ་ཆེ་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
ནོར་གནག་ཕྱུག་ངུར་སྒྲ་འབྱིན་ས་རེད།།
དཀར་འོ་མའི་རྒྱ་མཚོ་བསྐྱིལ་ས་རེད།།
སྨན་འབྲོག་མོའི་གཞོ་གླུ་སྙན་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
ལུག་གཡང་དཀར་འབའ་སྐད་འཚེར་ས་རེད།།
བལ་ཁ་ཆུའི་སྤྲིན་དཀར་འཁྲིགས་ས་རེད།།
ཕྲུག་སྣམ་བུར་དང་འདོད་ཆེ་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
ཕྱུག་བེའུ་ལུག་འཕེལ་ཁ་བརྡོལ་ས་རེད།།
རྟ་མདོ་ལུའི་བང་ཁ་མྱུར་ས་རེད།།
རྩི་མེ་ཏོག་འཇའ་མཚོན་ཤར་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
རོགས་བརྩེ་གླུ་ལེན་ནས་འགྲུས་ས་རེད།།
ལྷད་མེད་པའི་དུང་སེམས་བཅང་ས་རེད།།
མཐའ་མེད་པའི་དགའ་བ་མྱང་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
ཕུ་འབྲོག་པའི་ཚེར་ས་བཟང་ས་རེད།།
མདའ་ཆུ་མའི་འབྲུ་དྲུག་སྨིན་ས་རེད།།
བར་ཞིང་འབྲོག་འཚོ་བ་བཟང་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
རི་མཐོན་པོ་གནམ་ལ་བསྙེགས་ས་རེད།།
ལ་ཆེན་པོའི་ལ་རྩེ་གསོ་ས་རེད།།
རང་ཡབ་མེས་ཀྱི་ཆོས་ལུགས་དར་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
དབྱར་ཁུ་བྱུག་གསུང་སྐད་སྙན་ས་རེད།།
རི་དབུ་རྩེ་དྲང་སོང་བཞུགས་འདྲ་རེད།།
སྐེད་སྨུག་སྤྲིན་ན་གཟའ་མནབས་ས་རེད།།
ངའི་ཕ་ཡུལ་ས་ཆ་སྐྱེད་པོ་རེད།།
དགུན་ཕྱི་བས་བསྒྲུབ་ཉལ་རྒྱག་ས་རེད།།
ཡུལ་ཁ་བས་རི་ཀླུང་མཛེས་ས་རེད།།
ཆུ་མ་བབ་འཁྱགས་པས་གདམ་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
སྟོན་གསེར་གྱི་མེ་ཏོག་བཀྲ་ས་རེད།།
འབྲུ་སྙེ་མའི་མགོ་བོ་མཐོ་ས་རེད།།
ཕ་ཚོང་པ་ནས་ཀྱིས་ངོམས་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
དཔྱིད་ས་ཆུ་དྲོད་ཀྱིས་གསོ་ས་རེད།།
ཁྱིམ་སོ་ནམ་ལས་ལ་བྲེལ་ས་རེད།།
ལོ་གསར་པའི་རྟེན་འབྲེལ་ཆེ་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
ལྷ་བླ་མ་ཁྲི་ལ་བཞུགས་ས་རེད།།
འབངས་བུ་སློབ་མཐའ་ནས་བསྐོར་ས་རེད།།
ནང་སེམས་ཉིད་ཞེ་བདེ་འཕེལ་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
དུས་དེང་རབས་དཔལ་ཡོན་ཞན་ས་རེད།།
རྒྱ་དམར་པོས་བཙན་གནོན་ཆེ་ས་རེད།།
བུ་བདེན་པའི་རང་སྲོག་ཤོར་ས་རེད།།
ངའི་ཕ་ཡུལ་ས་ཆ་སྐྱིད་པོ་རེད།།
ྋམགོན་བསྟན་འཛིན་རྒྱལ་མཚོ་ཐུགས་རྗེ་ཅན།།
གསུང་མི་ཟད་རྒྱན་གྱི་འཁོར་ལོ་ཆེ།།
བོད་ཁ་བའི་ཞིང་དུ་བསྐོར་ནས་ནི།།
མ་འགྲོ་དྲུག་བདེ་ལ་འགོད་པར་ཤོག།
No comments:
Post a Comment