སྟོབས་བཅུ་དཔལ་དུ་རྫོགས་པའི་ཡེ་ཤེས་ཁམས།།
ཟླ་བཞིན་ལང་ཚོ་སྨིན་པའི་འཇོ་སྒེག་སྐུ།།
མཐར་བྱེད་སྟོབས་འཕྲོག་ཡིད་བཞིན་འཁོར་ལོ་ཡིས།། རྟག་བརྟན་ཚེ་བཅུད་སྣང་བ་དཔྱིད་དུ་སྩོལ།།
བྱམས་དང་སྙིང་རྗེའི་རྩལ་རྫོགས་གདོང་ལྔ་པ།། ཆོས་ཚུལ་འཆད་རྩོད་རྩོམ་པས་འཛིན་པ་ལ།།
ཕྱོགས་གླང་གྲགས་པའི་རྗེས་འགྲོ་མཁས་པའི་དབང་།། མཚུངས་མེད་རྗེ་བཙུན་བླ་མར་གསོལ་བ་འདེབས།།
ཕུལ་བྱུང་ལུང་དང་རྟོགས་པའི་འོད་སྟོང་གིས།།
བློ་བཟང་བསྟན་པའི་རི་གླིང་གསལ་བྱེད་ཅིང་།། ལོག་སྨྲའི་མུན་པ་དྲུང་ནས་འབྱིན་བྱེད་པའི།།
སྨྲ་བའི་ཉི་མ་མཆོག་ཁྱེད་རྒྱལ་གྱུར་ཅིག། མི་ཤིགས་རྡོ་རྗེའི་གཤིས་སུ་རྫོགས་པ་ཡི།།
ཆོས་ཀྱི་ཁྲི་ལ་སྲིད་པ་ཇི་སྲིད་བར།། མགོན་ཁྱོད་ཞབས་སེན་ནོར་བུའི་འོད་ཆགས་པ།།
གཡོ་མེད་རྡོ་རྗེ་སྐྱིལ་ཀྲུང་བརྟན་གྱུར་ཅིག། འཆད་པ་བདུད་རྩིའི་གྲུ་ཆར་ལྟར་ཕབས་པས།།
གདུལ་བྱའི་ཞིང་སར་དགེ་ལེགས་མྱུ་གུ་ནི།། ངེས་ལེགས་འབྲས་བུ་ཡོངས་སུ་དུད་མཛད་པའི།།
མཁན་མཆོག་ལྷ་ཡི་དབང་པོ་ཞབས་བརྟན་གསོལ།། ཡབ་རྗེ་རིང་ལུགས་པདྨ་དཀར་པོའི་ཚལ།། ལོག་པར་སྨྲ་བ་སྨྲ་བའི་མཚོན་རྣོན་གྱིས།།
གཞོམ་ལ་བརྩོན་པའི་ཕས་རྒོལ་གླང་སྨྱོན་འབུམ།།
མཐར་བྱེད་བརྩོན་པའི་སེངྒེ་ཞབས་བརྟན་ཤོག། མཚོ་བྱུང་ངང་མོར་མགྲིན་མཚོར་རོལ་པའི་དབྱངས།།
སྙན་མགུར་བྱེ་བའི་དྲན་དབང་ཐ་དག་གིས།། ཡི་ག་འཇོ་བའི་ལེགས་བཤད་རིན་ཆེན་སྟེར།།
དཔལ་ལྡན་དཔའ་བོ་གཉིས་པ་ཞབས་བརྟན་ཤོག། ཤིན་ཏུ་ཉམས་དགའ་ཐར་པའི་ཕོ་བྲང་ཆེར།།
ཚེགས་མེད་བགྲོད་པ་མྱུར་བའི་ཉེ་ལམ་མངོན།། འགྱུར་མེད་བདེ་དང་སྟོང་པའི་མཉམ་སྦྱོར་ཐུགས།།
བསྒྲུབ་བྱེད་ལམ་སྟོན་ཆེན་པོ་ཞབས་བརྟན་ཤོག།
བརྒྱད་གཉིས་ལང་ཚོ་མཛེས་པའི་འོད་གསལ་ཡུམ།། གཡས་གཡོན་ཉི་ཟླའི་ཁམས་དང་ལྷན་ཅིག་ཏུ།།
ཆོས་འཁོར་རྩིབས་བརྒྱད་དབུས་ཀྱི་དྷུ་ཏིའི་ན།། འཁྲིད་པའི་ས་མཁན་དམ་པ་ཞབས་བརྟན་ཤོག།
སྟོང་ཆེན་དབྱིངས་ལས་བྱུང་བའི་འོད་ལྔའི་སྤྲིན།། འདི་ནི་སྒྱུ་མའི་དངོས་དང་མཚུངས་སོ་ཞེས།།
སྦས་དོན་གསལ་བའི་རྡོ་རྗེ་སློབ་དཔོན་ཆེ།། སྲིད་མཐའི་བར་དུ་རྡོ་རྗེའི་ལང་ཚོར་རོལ།།
ནམ་ཡང་འགོག་མེད་འཕྲིན་ལས་ཉི་མའི་འོད།། དུས་ཀུན་ཕྱོགས་སུ་འཇུག་པ་ཆེས་མྱུར་ཞིང་།།
ས་གསུམ་ཡོངས་ལ་ལི་ཁྲིའི་ཚོན་བྱིན་པའི།། བློ་བཟང་བསྟན་པའི་པད་ཚལ་རྒྱས་གྱུར་ཅིག།
ཆོས་རྣམས་རང་བཞིན་སྟོང་པའི་མཁའ་དབྱིངས་ངོས།། དད་དམ་མོས་པའི་མཐུ་ཡིས་ལེགས་བཀོད་པའི།།
རྟེན་འབྱུང་གོམས་པ་མེད་པའི་རྡོ་རྗེ་ཁྲིར།། སྲིད་མཐའི་བར་དུ་ཡུན་དུ་གསལ་གྱུར་ཅིག།
དཔལ་ལྡན་བླ་མའི་རྣམ་པར་ཐར་པ་ལ།། སྐད་ཅིག་ཙམ་ཡང་ལོག་ལྟ་མི་སྐྱེ་ཞིང་།།
ཅི་མཛད་ལེགས་པར་མཐོང་བས་མོས་གུས་ཀྱིས།། བླ་མའི་བྱིན་རླབས་སེམས་ལ་འཇུག་པར་ཤོག
སྐྱེ་བ་ཀུན་ཏུ་ཡང་དག་བླ་མ་དང་།། འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་།།
ས་དང་ལམ་གྱི་ཡོན་ཏན་རབ་རྫོགས་ནས།། རྡོ་རྗེ་འཆང་གི་གོ་འཕང་མྱུར་ཐོབ་ཤོག།
No comments:
Post a Comment