དུང་སེམས་མ་བཅོས་གླུ་སྒྲ།

གནག་ཅིང་སྣུམ་པའི་དབུ་སྐྲ་སིལ་མ་ཡིས།།

ཡིད་འོང་མཉམ་ཞིང་མཛེས་པའི་སྐུ་སྟོད་ཁེབས།།

མཛེས་སྡུག་བཞིན་གྱི་སྟོན་མཚན་ཟླ་བའི་གཟིས།།

མྱོས་པའི་སྙིང་གི་ཀུནྡ་ཅི་ཡང་འཛུམ།།

དབང་པོའི་གཞུ་རིས་ལ་འགྲན་མིག་གི་དཀྱུས།།

གཡོ་བའི་ཉམས་ཀྱིས་རིང་པོར་བལྟ་བའི་ཚེ།།

ཆགས་ལྡན་ཡིད་ཀྱི་བརྟན་པ་གསེར་མིག་ཅན།།

དབང་མེད་འགུགས་པར་བྱེད་པ་ལྕགས་ཀྱུའི་ཟླ།།

བྱུ་རུའི་མཆུ་སྒྲོས་དམར་བའི་ཞལ་ཁྱིམ་ནས།།

དཀར་མཛེས་སོ་ཡི་ཕྲེང་བ་དྲི་ཞིམ་དང་།།

ལྷན་དུ་བརྩེ་དགའི་ཚིག་སྙན་ག་བུར་གཏམ།།

ངོ་མཚར་སྙིང་ལ་སིམ་པའི་ཚོར་བ་སྟེར།།

ལྟ་ན་སྡུག་པའི་དབྱིབས་ལེགས་རྣ་བའི་རྩེར།།

ཟུར་གསུམ་འོད་ཀྱིས་འཁྱུད་པའི་རྣ་རྒྱན་གྱིས།།

མཛེས་པའི་འདྲེན་བྱེད་ཡུལ་གྱི་དགའ་སྟོན་འདི།།

ལྷ་ཆེན་མེས་པོས་བསྐྲུན་པར་བྱས་སམ་ཅི།།

སེན་རྗེས་མ་ཕབ་ཟླུམ་ཞིང་རྒྱས།།

ནུ་འབུར་གཡོ་བའི་དགའ་སྟོན་གྱིས།།

བསླབ་གསུམ་རྒྱན་རྣམས་དམར་བྱས་ཤིང་།།

དཀའ་ཐུབ་བརྟེན་རྣམས་དགའ་བས་མྱོས།།

ཁྲིལ་ལྡེམ་དལ་གྱིས་འཆག་པའི་ཚེ།།

རི་མོ་གསུམ་པའི་འཕོངས་ཚོས་དག།།

ཟླུམ་ཞིང་རྒྱས་པའི་གཡོ་འགུལ་གྱིས།།

བཟོད་མེད་སྙིང་ལ་ངལ་བ་སྦྱིན།།

སྒེག་འགྲོས་སྣོལ་མའི་གླང་ཆེན་གྱི།།

པདྨའི་རྐང་རྗེས་ནོར་འཛིན་མར།།

བཀོད་ཚེ་བདག་སེམས་བྷྲ་མ་ར།།

རོལ་འདོད་དབུགས་ཀྱི་རྒྱུ་བ་བྲེལ།།

མཛེས་ཞལ་དཀར་མར་མཚོན་གྱིས་བྱུག་པ་མེད།།

དོན་མེད་གཏམ་གྱིས་གཞན་སེམས་དཀྲུགས་པ་མེད།།

ངག་འཕྲུལ་གཡོ་སྒྱུས་གཞན་མགོ་བསྐོར་བ་མེད།།

ཀུན་གྱི་སྙིང་སྡུག་ལྷན་སྐྱེས་ཡོན་ཏན་རྫོགས།།

དྲི་གཞོན་གྱིས་བསྐྱོད་དབུ་སྐྲ་ཉག་མས་སྟག་ཤར་ཀུན་གྱི་ཡིད་སེམས་འཆིང་།།

ཡིད་འོང་འདོད་འཇོའི་ནུ་འབུར་ཟུང་གིས་སོ་ཐར་ཁྲིམས་ཀྱི་འཆིང་བ་ལྷོད།།

མཉེན་འཇམ་བརླ་ཡི་གཡོ་འགུལ་རེ་རེས་སྒྱུ་མའི་རོ་གར་ཅི་ཡང་བསྟན།།

འཇོ་སྒེ་ལུས་ཀྱི་རྣམ་འགྱུར་རེ་རེས་འཇིག་རྟེན་གསུམ་ལས་རྒྱལ་བར་སྤོབས།།

མ་བཅོས་སྐེད་སྐབས་ཕྲ་ལ་འཁྱོག །

རང་བྱུང་གར་གྱི་སྒྱུ་རྩལ་ལྡན།།

ལྔ་ཟུང་ལག་པའི་སོར་མོ་རྣམས།།

འཇམ་མཉེན་པདྨའི་རྩ་ལག་བཞིན།།

སྙིང་གི་སྡུ་གུ་མདོངས་མཐའ་མས།།

ལང་ཚོའི་སྒྲོ་གུར་ངོམ་པའི་ཚེ།།

དུང་སེམས་ཆུ་འཛིན་ཀློང་རོལ་ནས།།

མཛའ་བརྩེའི་སྤྲིན་སྒྲ་སྒྲོག་ལ་རིངས་།།

ཕྱི་ལོ་༢༠༠༨ །༡༢ །༢༩ ཉིན།