རྗེས་དྲན་དད་པའི་དབྱངས་རྟ།

ལྷུན་གྲུབ་རྒྱ་མཚོ་འཕྲིན་ལས་རླབས་ཕྲེང་གཡོས་པ་ལས།།

བྱུང་བའི་ཟླ་གཞོན་དགེ་ལེགས་བྱེ་བའི་མཚན་མ་ཅན།།

ཡེ་ཤེས་ཟིལ་གྱིས་མ་རིག་དྲུང་ནས་འབྱིན་མཛད་ལྷ།།

ངང་པའི་བུ་མོ་བདག་མགྲིན་འོ་མཚོར་རྩེན་པར་མཛོད།།

དམར་སེར་རྡུལ་བརྩེགས་ས་འཛིན་ལྷུན་པོའི་རྩེར།།

ཡིད་འོང་ཨིནྜ་ནི་ལས་གཡོག་པ་བཞིན།།

མཐོན་མཐིང་རལ་པའི་ཟུར་ཕུད་ལྔ་པ་ཅན།།

འཇམ་དབྱངས་སྨྲ་བའི་གཏེར་དེས་རིང་ནས་སྐྱོངས།།

རྨད་བྱུང་སྒྱུ་འཕྲུལ་རིགས་གསུམ་འདུས་པའི་སྐུ།།

མི་ཟད་འཇིགས་ལས་སྒྲོལ་བའི་མཐུ་ཆེན་གྱིས།།

མཁའ་ཡི་ཡིད་ཅན་འདྲེན་པའི་ཁུར་འཁྱེར་བ།།

རྗེ་བཙུན་བླ་མའི་རྣམ་ཐར་དྲན་བཞིན་འདུད།།

མགོན་ཁྱོད་མདོ་ཁམས་ས་ཡི་ཐིག་ལེ་རུ།།

སྲིད་དང་ཞི་བའི་ཚ་གདུངས་གཞིལ་བའི་དཔལ།།

ལྷ་བཅས་བསོད་ནམས་གསོག་པའི་ཞིང་མཆོག་ཏུ།།

བལྟམས་པའི་སྐྱེ་རྒུའི་བསྐལ་བཟང་མགོན་དུ་བརྗིད།།

དེ་ཚེ་རླན་བྲལ་འཁྲི་ཤིང་སྡུ་གུ་མས།།

ཡལ་འདབ་མེ་ཏོག་གོས་བཟང་རྣ་རྒྱན་སོགས།།

སྣང་མང་ངོ་མཚར་ཆས་ཀྱིས་ལེགས་སྤྲས་ཏེ།།

མ་བོས་སྒང་དྲུག་མཛའ་བོའི་འགྲོན་དུ་བྱས།།

གཞོན་ཚེ་གཞོན་ནུ་དོན་གྲུབ་ཇི་བཞིན་དུ།།

ལྷན་སྐྱེས་ཡོན་ཏན་རིན་ཆེན་དོ་ཤལ་གྱིས།།

འགྲོ་བའི་ཡིད་ཀྱི་མཛའ་མོ་མཛེས་བྱས་ཚེ།།

འཇིག་རྟེན་འདི་ན་ཡ་མཚན་ཁྱོད་ཅེས་གླེང་།།

བྱམས་གླིང་ནོར་འཛིན་བ་གམ་ཆོས་ཀྱི་སྡེར།།

བསླབ་གསུམ་གསེར་གྱིས་རྒྱལ་མཚན་གཡོ་བའི་གཟིས།།

རབ་འབར་གྲགས་སྙན་རིན་ཆེན་རྣ་ཆ་ཡིས།།

ཕྱོགས་ཀྱི་བུ་མོའི་སྙན་ཤལ་རིང་དུ་བྱས།།

མ་སྨད་ཚུལ་ཁྲིམས་དྲི་མེད་ཡོན་ཏན་ནོར།།

ཤིན་ཏུ་ལྕི་བའི་ཁུར་ཆེན་སྦྲུམ་པའི་ཚེ།།

གསེར་ལྡན་སྒེག་མོའི་ལྟོ་བ་རལ་འགྱུར་ཞེས།།

ཚངས་ཆེན་མེས་པོ་ངལ་བ་ཁུར་གྱིས་མནན།།

ཐུབ་བསྟན་ཀུ་མུད་ཆོས་གྲྭའི་ཚལ་ཆེན་དེར།།

བྱམས་པའི་མཚན་འཆང་སྟོན་མཚན་ཟླ་བ་ཡིས།།

བཤད་སྒྲུབ་འོད་ཀྱིས་མཛེས་པར་བྱས་སོ་ཞེས།།

མཁས་དགུས་བསྟོད་པའི་གྲགས་སྙན་འབྲུག་ལ་འགྲན།།

དམ་པའི་ཞལ་གྱི་པདྨ་ལས།།

བྱུང་བའི་མན་ངག་སྦྲང་རྩིའི་བཅུད།།

ངོམས་མེད་གཞིབ་པའི་བསུང་ཞིམ་ནི།།

མཁས་མང་གསེར་རིའི་ཁོར་ཡུག་གི།

གླིང་བར་རྣམས་སུ་སོང་བ་ཡིས།།

སྙན་པའི་བག་དན་གཡོ་བའི་སྒྲས།།

རྨ་རྫ་འབྲི་གསུམ་སྐྱེངས་བྱས་ནས།།

ངལ་མེད་དུས་བཞིར་མཐའ་རུ་བྲོས།།

ངོ་མཚར་ཆོས་ཀྱི་ཚུལ་ལུགས་མཐའ་ཡས་མདུད།།

ལྷན་ཅིག་གྲོལ་མཛད་གནས་ལྔ་རིག་པའི་གཞུང་།།

མདོ་ཁམས་ལྗོངས་སུ་མགྲོན་དུ་འབོད་མཁས་པོ།།

སྔོན་མེད་སྐབས་གསུམ་སྲིང་མོ་ཁྱོད་ཉིད་ཅེས།།

བསྔགས་པ་བརྗོད་ལ་ཉི་མ་ཟླ་བ་ཡང་།།

ལྟ་བའི་ཟོལ་གྱིས་མཁའ་ལ་ཅིའི་མི་རྒྱུ།།

མཁྱེན་པའི་རྒྱ་མཚོའི་གོས་ཅན་ངོས།།

སྣ་ཚོགས་རྒྱལ་བསྟན་མེ་ཏོག་འཛུམ།།

མདོ་སྔགས་གེ་སེར་ཅི་ཡང་རྒོད།།

འགྲོ་ལ་ཕན་བདེ་དཔལ་ཡོན་བསྐྲུན།།

སྐལ་ལྡན་དད་པའི་གདོང་ལྔ་པས།།

བཏེག་པའི་ཁྲི་ལ་བཀོད་པའི་ཚེ།།

གསུང་གི་ཆ་ཤས་རེ་རེ་ཡིས།།

ལུང་རིགས་སྟོང་གིས་ཕྱུག་པ་ཡི།།

སྨྲ་བ་མཁས་པའི་ཚོགས་རྣམས་ཀྱི།།

རལ་པ་ཞབས་ཀྱི་གདན་དུ་བྱས།།

ལྔ་རིག་ཟུང་གིས་བསྐྲུན་པའི་གདུགས་དཀར་ཆེ།།

བླ་ན་མཐོར་བཏེག་ཕན་བདེ་གྲིབ་བསིལ་འབུམ།།

ཡངས་པའི་ལྗོངས་སུ་འཁོར་བའི་བྱེད་པོ་རུ།།

མགོན་ཁྱོད་བསམ་བཞིན་སྲིད་པར་བརྫུས་པ་དོགས།།

ནག་ཕྱོགས་རང་མཚང་མཚོ་བཞིན་བརྡོལ་བའི་དུས།།

ཐུབ་བསྟན་ནུབ་ཀྱི་རི་རྩེར་གོས་དམར་གྱིས།།

མཛེས་ཚེ་ཁྱེད་སྐུ་མཚན་མོའི་མགོན་པོ་ཡང་།།

དབང་མེད་ཡུན་རིང་མར་ངོའི་ཟོལ་ལ་བརྟེན།།

དུས་ཀྱི་སྨག་རུམ་ཡོངས་བསལ་ཏེ།།

གང་ཉིད་སྲིད་པའི་སྒྲོན་མེ་རུ།།

འཛུམ་ཚེ་ཀླུ་སྒྲུབ་གཉིས་པ་ཞིག།།

སླར་ཡང་གནས་དེར་ཕེབས་པ་བཞིན།།

དྲན་པའི་མི་བཟོད་གནར་བཅོད་ལྷན།།

ལོ་མང་བརྒལ་ཡང་ཚངས་སྤྱོད་ཀྱིས།།

དྲང་སོང་གསར་བུའི་གནས་འཁོད་དེ།།

གུས་པའི་དཔྲ་རིས་འཛིན་མའི་རྒྱན།།

འཆར་ཀའི་མདངས་ལ་ཅོ་འདྲི་བའི།།

འདུས་སྡེ་གཙུག་གི་ལ་ཐོད་རྩེར།།

གསུམ་ལྡན་རྡོ་རྗེ་འཛིན་པའི་སྐུར།།

འགྱིངས་ཚེ་ཆབ་གཉིས་འདུས་པའི་མདོར།།

བཤད་སྒྲུབ་བསྟན་པའི་བྱ་བ་ཡིས།།

ན་ལན་ཌ་ལ་རྒོལ་བ་བཞིན།།

སྔོན་གོམས་ཚོགས་གཉིས་མ་ལ་ཡིས།།

འཕྲིན་ལས་དྲི་གཞོན་གྱིས་བསྐུལ་ཏེ།།

ཆབ་གཉིས་འདུས་པའི་ཀ་ཤིའི་ངོས།།

བྲིས་པའི་རྒྱལ་བསྟན་ལྷ་ཡི་གཟུགས།།

མི་གཙང་ལོག་ལྟའི་རྡུལ་བག་གིས།།

བསྒྲིབས་པ་ལྷར་ཡང་གསལ་བར་བྱས།།

གསེར་སྦྱང་གཙོ་མའི་མདོ་སྔགས་གཞུང་།།

ལུང་རིགས་བྱེ་བའི་ཕྲས་མཛེས་པའི།།

གསུང་གི་མཛད་པའི་རྣ་ཆ་ནི།།

གཟུར་གནས་ཀུན་གྱི་སྙན་ལ་འཕྱངས།།

གསིལ་ལྡན་ནོར་འཛིན་དགའ་མའི་དབང་ཕྱོགས་སུ།།

མང་ཐོས་ལུང་རིགས་ཉི་མ་ཆེན་པོ་ཡིས།།

གང་འདུལ་མཐའ་ཡས་སྒྱུ་འཕྲུལ་རོ་གར་ལ།།

རི་སྐྱེས་རྣམ་ཀྱང་དད་པས་མགོ་བོ་སྨད།།

སྒྲ་ཚད་གཟོ་དང་གསོ་སོགས་རིག་གནས་ཀུན།།

ལེགས་པར་སྨྲ་ལ་ཧཱ་པཎྜི་ཏ།།

བློ་གསལ་ཐར་འདོད་ཡོངས་ཀྱི་མིག་གཅིག་པུ།།

ཐུབ་བསྟན་ལུགས་འཛིན་ཀུན་གྱི་གཙུག་གི་རྒྱན།།

ཉི་མ་སྟང་ལྟར་འབར་བའི་གཟི་ལྡན་སྐུ།།

སྙན་གྲགས་ལྷ་ཡི་རྔ་བཞིན་དབྱངས་སྙན་གསུང།།

ཆུ་གཏེར་ཀློང་ལྟར་ཟབ་ཡངས་དཔག་དཀའི་ཐུགས།།

སྲིད་པ་གསུམ་འདིར་ཡོན་ཏན་ཚོགས་ཀྱིས་བརྗིད།།

རེ་དགུ་བཞེས་པ་ས་མོ་བྱི་བའི་ལོ།།

ཞིང་འདིར་དངོས་ཀྱི་གདུལ་བྱ་རྫོགས་པའི་ཚུལ།།

སྟོན་ཞིང་རྟག་འཛིན་ཅན་རྣམས་ཆོས་སྐུལ་བའི་ཕྱིར།།

ཆུ་སྟོད་ཟླ་བའི་ཡར་ཚེས་དབྱིངས་སུ་གཤེགས།།

ས་གཞིའི་ངོས་སུ་གུར་གུམ་གྱི།།

ཚོམ་བུ་བཀོད་འདྲའི་བུ་སློབ་ཚོགས།།

མཉེན་འཇམ་ཕྱག་གི་པད་མོ་ནི།།

ཟླ་བ་མཁའ་ཡི་ངང་ཚུལ་གྱུར།།

འབྲས་བུ་ཁུར་དུད་ལྗོན་པ་བཞིན།།

ཅོད་པན་ས་ལ་དུད་དང་ལྷན།།

མིག་གི་མཆི་མའི་ཆར་རྒྱུན་གྱིས།།

མྱ་ངམ་ཐང་ལ་ཆག་ཆག་བཏབ།།

ལྷ་སོགས་འགྲོ་བ་བྱེ་བའི་ཚོགས།།

མཐོང་བ་དོན་ལྡན་ཉིད་ཀྱི་སྐུར།།

གཡས་སུ་བརྒྱ་སྟོང་བསྐོར་བ་ནི།།

གོམ་པ་འཁྱོར་བའི་འགྲོས་ལ་བརྟེན།།

ཐོས་ན་དད་པའི་སྤུ་གཡོ་ཞིང་།།

བསམས་ན་རྣམ་རྟོག་འགག་པ་གང།།

མ་མཐོང་རྡུལ་གྱིས་སྲུབ་པའི་མིག།།

སྤྲིན་བྲལ་ཆར་གྱིས་གདོང་དག་བཀྲུས།།

འགྲོ་བའི་གཉེན་ཁྱེད་སྐྱེས་རབས་མུ་ཏིག་ཕྲེང་།།

བསམ་བཞིན་སྲིད་པའི་སྲད་བུ་ལ་བརྒྱུས་ཏེ།།

འགྲོ་ལ་དགའ་སྟོན་བསྐྲུན་པའི་དོ་ཤལ་ཆེ།།

མགུལ་བར་མཛེས་པའི་ཕ་མཐའ་ལྷ་ལམ་བཞིན།།

བསམ་གྱིས་མི་ཁྱབ་རྒྱལ་སྲས་སྤྱོད་པ་ཡིས།།

རབ་འབྱམས་ཞིང་དུ་བལྟམས་དང་འདས་བཞེད་སོགས།།

གང་འདུལ་དཔག་དཀའི་ཆུ་ཟླའི་རོལ་གར་ལྷན།།

བརྩེ་བའི་གཟུགས་སྐུའི་བཀོད་པ་མྱུར་སྟོན་མཛོད།།

འདྲེན་མཆོག་ཁྱེད་ཀྱི་ཞབས་ཀྱི་རྡུལ་ཕྲན་ཙམ།།

སྐལ་དམན་བདག་འདྲའི་བརྗོད་པའི་ཡུལ་མིན་ཡང་།།

གང་ཉིད་དྲན་ཞིང་དད་པའི་ལུས་སྐྱེས་ཚོགས།།

གཡོ་ཞིང་གདུངས་བས་མ་བཟོད་འདི་སྐད་ཐལ།།

མཛད་པའི་ཆ་ཤས་ཆུ་འཛིན་ཡིད་མཁའ་རུ།།

དཀྲིག་པའི་ཆར་གྱིས་འདྲེན་བྱེད་བསྙལ་དང་ལྷན།།

དབང་མེད་སོར་འདུས་འདི་འབད་དགེ་འཆིས་ན།།

འགྲོ་ཀུན་ཁྱེད་རྗེས་འཛིན་པའི་རྒྱུར་གྱུར་ཅིག།།

འདི་ནས་ཚེ་རབས་ཕྲེང་བ་ཐམས་ཅད་དུ།།

མགོན་ཁྱེད་མཉེས་པ་གསུམ་གྱིས་མཉེས་བྱེད་ནས།།
མི་ཕམ་མགོན་པོའི་ཆོས་ཀྱི་མདུན་ས་ཆེར།།

ཐོག་མའི་གསུང་གི་བདུད་རྩི་འཐུང་བར་ཤོག

ཅེས་བྱམས་ནོར་གྱིས། ཕྱི་ལོ་ ༢༠༠༩ ཟླ་ ༡༠ ཕྱི་ཚེས་ ༡༠ ཉིན་བྲིས་ཤིང་ལོ་དེའི་དུས་དེབ་གངྒའི་བཞད་སྒྲའི་ནང་བཀོད་ཟིན་པ་ཞིག་ཡིན།