ཀོ་ནད་བཅུ་དགུ་ཤར་ནས་ནུབ་ཏུ་མཆེད།། (ཆབ་མདོ་ཤེས་རབ།)

ཀོ་ནད་བཅུ་དགུ་ཤར་ནས་ནུབ་ཏུ་མཆེད།།
གསོན་པོའི་མི་རྣམས་ཕྱི་མའི་ཡུལ་དུ་བརྫངས།།
བསགས་པའི་རྒྱུ་ནོར་གད་སྙིགས་ཁྲོད་ན་ལུས།།
བརྩེགས་པའི་ཕ་ཁང་རང་གི་བཙོན་ཁང་གྱུར།།

ཟ་ཁང་མགྲོན་ཁང་སྒོ་ལྕགས་བཙའ་ཡིས་ཟིན།།
གཞུང་ལམ་སྲང་ལམ་རྣམས་སུ་རྒྱུ་འགྲུལ་ཆད།།
སློབ་གླིང་སྤྱི་གླིང་འཇག་མས་ཤུར་གླུ་ལེན།།
གྲོང་དང་གྲོང་ཁྱེར་མི་ཡིས་སྟོངས་སམ་ཅི།།



ལྷག་ལུས་མི་རྣམས་འཆི་བདག་ཁར་ཆུད་བཞིན།།
ལྷག་པར་སྐྲག་ནས་སྨན་འགོག་གཉིས་ལ་སྒུག།
རེ་བའི་མིག་གིས་ཕྱོགས་བཞིར་བལྟས་ན་ཡང་།།
རེ་དོན་མ་འགྲུབ་ལུས་སེམས་ལྷག་པར་གདུང་།།

སྨན་ཁང་རྣམས་ནི་ནད་པས་བྱུར་བུར་གང་།།
སྨན་པ་རྣམས་ནི་ངལ་བས་ཨ་ཐང་ཆད།།
སྨན་ཞབས་མ་རྣམས་རྒྱུག་པས་རྐང་ཆུ་ལུག།
སྨན་དཔྱད་ཡོ་བྱད་ལྟག་ཆད་རྫིང་ལྟར་གྱུར།།

ནད་ཀྱི་རྗེས་སུ་མུག་དང་དམག་འཁྲུག་ཅེས།།
ནད་མེད་རྒས་པོའི་སྡོམ་ཚིག་བདེན་གྱུར་ན།།
ནད་མུག་མཚོན་གྱི་བསྐལ་པས་འཇིག་རྟེན་འདིར།།
ནད་ཅན་ནད་མེད་འགྲོ་ཀུན་འཇིག་ཀྱང་སྲིད།།

འོན་ཀྱང་ལྷ་སྲུང་མཐུ་བོ་ཆེ་རྣམས་དང་།།
ཚན་རྩལ་སྨན་པའི་ཚོགས་ཀྱིས་མ་ཝ་ན།།
སྒེར་གྱི་སེམས་ཁྲལ་ནད་ཀྱི་རྒྱུ་ཙམ་ལས།།
ཕན་ཐོགས་མེད་པས་སེམས་པ་ལྷོད་ལ་ཞོག།

སྤྱི་ཚོགས་རྒྱང་འགྱེད་བཀའ་རྒྱ་ཕབ་པ་ལས།།
ཐམས་ཅད་བསེ་རུ་ལྟ་བུ་གནས་དུས་འདིར།།
ཉིན་མཚན་གཉིས་པོ་ཟ་སྐྱིད་ཆོས་གསུམ་ངང་།།
འདའ་བར་བྱས་ན་རྐྱེན་ངན་གྲོགས་ཤར་ཡིན།།

འབྲུ་སྲན་སྣ་ལྔའི་བཅུད་ལ་རོལ་བཞིན་དུ།།
ལྟད་མོ་ལེ་འུ་དྲུག་པ་ལྟ་བའི་ཞོར།།
དུས་ཚོད་སྐར་མ་བདུན་ཙམ་བེད་སྤྱད་ནས།།
ཚིགས་བཅད་བརྒྱད་འདི་གསོན་པོའི་བརྡ་རུ་བྲིས།།
ཆབ་མདོ་ཤེས་རབ་ཀྱིས་བྲིས།