དྲན་གདུང་གིས་སྲུང་བའི་ཉི་ནུབ།

མི་འགྱུར་གནའ་ཚིག་རི་མོ་སེམས་ལ་བྲིས།།

ཞིམ་མངར་སྦྲང་རྩི་རོ་ལྟའི་བདེ་སྐྱིད་ལ།།

རོལ་བའི་འགྱུར་མེད་བརྩེ་དུང་ཟབ་མོ་དེ།།

བསམ་ཚེ་ཁྱོད་ཉིད་དྲན་པས་སྡོད་མི་ཚུགས།།

བརྗེད་དཀའི་ལྷན་འཛོམས་ཉིན་ཞག་ཐུང་ན་ཡང།།

སེམས་པའི་སྙིང་གཏམ་བརྗོད་བཞིན་མགོ་བོ་སྦྱར།།

ཉ་གང་འཛུམ་བསུའི་རྩེད་འཇོའི་གཡེང་བ་ཀུན།།

བསམ་ཚེ་ཡིད་ཀྱི་མིག་ཆུས་དྲན་པ་བརླན།།

སྐྱིད་དུས་སྐྱིད་སྣང་སེམས་ཀྱིས་མ་ཚོར་བ།།

སྡུག་ན་སྡུག་གི་ཁུར་པོ་མི་ཐེག་པ།།

དྲན་གདུང་མེ་ལྕེས་བསྲེག་པའི་ངང་ཚུལ་འདི།།

བསམ་ཚེ་དབང་མེད་འོད་དོད་འབོད་ལ་ཁད།།

སྙིང་སྡུག་རྒྱང་རིང་མི་ཡུལ་ས་མཐའ་རུ།།

འཚོ་ཕྱིར་ལུས་སེམས་རྩེ་གཅིག་བསྒྲིམས་ནང་ཡང་།།

ཉིད་ཀྱི་ལྷག་བསམ་བྱམས་བརྩེའི་དྲོད་འཁོལ་ཉིད།།

བསམ་ཚེ་འགོག་མེད་ཤུགས་རིང་ནར་ནར་ཤོར།།

གདུང་བས་སེམས་པ་ཕྲ་མོ་འཁྱག་གིས་བསྡམས།།

རིད་པས་ཁེར་རྐྱང་འཚོ་བ་མྱ་ངམ་ཐང།།

བརྩེ་དུང་མེ་དཔུང་མཁའ་ལ་འཕྱོ་བའི་ཚུལ།།

བསམ་ཚེ་ཡ་ཆུང་སྙིང་ལ་ན་ཟུག་ལྕི།།

ཉིན་མཚན་བར་མེད་ཞལ་རས་ཡིད་ལ་འཆར།།

མལ་དུ་བསྡད་ཀྱང་སེམས་པ་རྒྱང་དུ་ཤོར།།

བ་སྤུ་གཡོ་བཞིན་སེམས་ཀྱི་རེ་སྒུག་འདི།།

བསམ་ཚེ་མིག་ཟུང་ཉི་ནུབ་ཕྱོགས་སུ་ཤོར།།

སྐྱོ་གདུང་ན་ཟུག་དྲག་པོའི་སྙིང་གི་གཏམ།།

གཞན་ལ་མངར་སྐྱུར་ཚོར་སྣང་དབེན་ན་ཡང།།

བཅོས་མིན་ཡིད་གདུངས་དྲག་པོའི་ཚོར་སྣང་ལྷན།།

འགོག་མེད་མགྲིན་པའི་སྦུག་ནས་ཡུད་ཀྱིས་ཐལ།།

༢༠༡༡ ལོར་ངོ་དེབ་ནང་བྲིས་པ་ཞིག་ཡིན།