དྲན་གདུང་ལ་བརྒྱུས་པའི་ཁྱོད།
རྨི་ལམ་ཟོལ་གྱིས་མཇལ་བའི་ཁྱོད་ཉིད་ལ།།
འཕྲད་ཀྱང་མ་ཕྲད་ལྟ་བུའི་ཡིད་གདུང་གིས།།
སྒུག་པའི་མིག་ཆུ་སྙིང་གི་གཏིང་རུམ་ནས།།
དྲན་པའི་ཆུ་གཏེར་ནང་དུ་ཐིགས་པར་བྱེད།།
ཁྱོད་ཀྱི་དྲན་པས་བཅིངས་པའི་སེམས་པ་འདི།།
གཏོང་ཡང་མི་ཐོང་ཟིན་ཡང་མི་ཟིན་པར།།
ནམ་མཁའི་སྤྲིན་དཀར་བཞིན་དུ་འཁྱམས་ནས་ནི།།
འཁྱུད་པའི་འདོད་པས་རྨི་ལམ་བཞིན་དུ་རྒྱུ།།
རེ་བའི་མེ་ཏོག་སྙིང་ལ་ཤར་བའི་ཚེ།།
གདུང་བའི་རླུང་གིས་གཡོ་བའི་ལོ་མ་བཞིན།།
འཕྲལ་གྱི་དགའ་སྐྱིད་སྐད་ཅིག་ཙམ་ལ་ནི།།
འཇའ་ཚོན་མདངས་བཞིན་རི་མོར་ཡལ་ནས་འགྲོ།།
མཚན་མོའི་རྨི་ལམ་ཁྲོད་ཀྱི་དགའ་སྐྱིད་དང་།།
ཉིན་མོའི་དྲན་པའི་གདུང་བ་འདྲེས་པ་ཡི།།
བདེ་སྡུག་ཟུང་འབྲེལ་སེམས་ཀྱི་རྒྱ་མཚོ་རུ།།
ཁྱོད་ཀྱི་གཟུགས་བརྙན་ཆུ་ནང་ཟླ་བར་མཚར།།
གནམ་སའི་བར་གྱི་བཅག་པའི་ལམ་བུ་ན།།
ང་ཚོའི་རྐང་རྗེས་ཧ་ཅང་གསལ་པོར་གནས།།
དྲན་པའི་རི་མོ་སྙིང་གི་གཏིང་རིམ་ན།།
ཕ་ལམ་གསེར་འོད་ཞུན་མའི་འོད་ལྟར་འཚེར།།
མཐོང་ཡང་མ་མཐོང་འདྲ་བའི་སྙིང་གི་གྲོགས།།
དྲན་ཡང་མ་དྲན་འདྲ་བའི་གདུང་སེམས་ཀྱིས།།
བརྩེ་བའི་ཚོར་བས་ཁེངས་པའི་སྙིང་གཏམ་རྣམས།།
གློག་རྡུལ་བརྒྱུད་ནས་འཕྲིན་ཡིག་རྣམ་པར་རྒྱུ།།
2025/01/02
No comments:
Post a Comment