ས་ར་ཧའི་གསུང་། གསང་ཆེན་སྨྱོན་པའི་སྤྱོད་པ་ལྷག་པར་བྱས་ནས་ནི།། བྱ་མིན་མི་བྱ་མིན་པའི་སྤྱོད་པ་རང་ཤུགས་ཀྱིས།། གླང་ཆེན་མཚོ་རུ་འཇུག་འདྲ་རྟག་ཏུ་སྨྱོན་སེམས་ཀྱིས།། སྨད་པའི་ཆོས་རྣམས་སྤྱད་ན་གྲོལ་བར་མདའ་བསྣུན་སྨྲ།། ཞེས་དང་། ཀུན་མཁྱེན་ཀློང་ཆེན་པས། དུར་ཁྲོད་ལ་སོགས་དབེན་པའི་གནས་སོང་སྟེ།། མི་གཙང་ངོ་ཚ་ཚུལ་འཆོས་རབ་སྤངས་ལ།། གཉིས་མེད་རང་གྲོལ་ལྟ་སྒོམ་ངང་ཉིད་ནས།། བླ་དོར་འཛིན་མེད་སྨྱོན་པའི་བརྟུལ་ཞུགས་ཀྱིས།། འགྲོ་དང་འདུག་དང་མཆོང་དང་རྒྱུག་པ་དང་།། སྨྲ་དང་དགོད་དང་ངུ་དང་གླུ་ལེན་དང་།། དགའ་དང་མི་དགའ་ཆགས་སྡང་བདེ་སྡུག་དང་།། རིགས་དྲུག་སྤྱོད་པ་མཐོང་ཐོས་དྲན་ཚད་བྱ།། ཞེས་གསུངས།
No comments:
Post a Comment