ཡིད་འཕྲོག་མཛེས་སྡུག་གཅིག་བསྡུས་དྭངས་མས་ཀྱང༌།།
འགྲན་པར་མི་ནུས་ཕུན་སུམ་ཚོགས་པའི་དཔལ།།
སྨྱུག་འཆང་བུ་མོའི་བརྩེ་གྲོགས་དབྱངས་ཅན་མས།།
སྲིད་ཞི་འདོད་རྒུ་ཆར་དུ་བསྙིལ་བར་མཛོད།།
རྣམ་རྒྱལ་ཁང་བཟང་འཆི་མེད་གྲོང་ཁྱེར་ནས།།
མ་བོས་འཛམ་བུའི་གླིང་འདིར་འཕོས་འདྲ་བའི།།
ལྔ་རིག་དགའ་ཚལ་མ་ཡུམ་སློབ་གླིང་འདིར།།
འཛོམས་པའི་ལྷག་བསམ་དཀར་བའི་སྨྱུག་གྲོགས་ལགས།།
ཕ་མ་གཅིག་ལས་མཆེད་པའི་སྤུན་མིན་ཀྱང༌།།
མི་རིགས་ལ་ཞེན་ཅན་གྱི་སྙིང་རུས་དང༌།།
ཕན་ཚུན་མཛའ་བརྩེའི་སློབ་ལ་མཉམ་ཞུགས་ཕྱིར།།
དབང་མེད་སྨྱུག་གུའི་རྩེ་འཇོའི་གར་ལ་བྲེལ།།
མེས་པོ་དམ་པའི་སྙིང་ནོར་རིག་པའི་གཞུང༌།།
མ་འོངས་བོད་ལྗོངས་གསར་པའི་མདུན་ལམ་ཆེད།།
ཚ་བའི་ཡུལ་དུ་ངལ་བ་ཁྱད་བསད་དེ།།
ཛ་དྲག་ཐང་ལྷོད་མེད་པར་སྦྱང་བར་གཅེས།།
ཧ་ཅང་གཉེན་འཕྲང་ཅན་གྱི་དུས་ཚོད་འདིར།།
རིགས་དང་ལང་ཚོ་རྫོགས་པའི་བོད་ཕྲུག་འགའ།།
འཁྱམས་ཉུལ་མི་ཚེ་རྫོགས་པའི་ཚུལ་མཐོང་ཚེ།།
ཉམ་ཆུང་ང་ཡང་མཚམས་རེ་སེམས་པ་སྐྱོ།།
མཛེས་པའི་གཏམ་དང་སྙན་མོའི་སྡེབ་སྦྱོར་མེད།།
ཟབ་མོ་དོན་གྱི་བརྗོད་བྱའི་དབུལ་ན་ཡང༌།།
རང་གི་སེམས་ལ་གང་ཤར་བཀོད་པ་ལས།།
ཟོག་པོའི་ཚུལ་ཆོས་རང་གཤིས་བདག་ལ་མེད།།
དེ་ཕྱིར་འདི་ལ་ནོངས་པའི་ཚོགས་མཆིས་ན།།
བྱམས་བརྩེའི་པིར་གྱི་རྩེ་མོ་ལས་འོང་བའི།།
བློ་གྲོས་འཕྲུལ་གྱིས་བསྐྲུན་པའི་ཡི་གེའི་གཟུགས།།
དཀར་གཙང་ཤོག་བུའི་ངོས་སུ་འབེབས་པ་འཚལ།།
རྩོམ་ཡིག་འདི་ནི་སྨྱུག་གྲོགས་མཛེས་མ་ཞིག་ཡོད་པ་དེས་གུས་པར་བཏང་བ་ཞིག་རེད།
No comments:
Post a Comment